XAKEKO TALDEKAKO
EUSKAL LIGA.
(2014ko
urtarrilaren 10etik martxoaren 7ra).
OHOREZKO MAILA.
SESTAOK EUTSI ZION
LEHENENGO POSTUARI ETA URNIETAK ETA ABADIÑOK PORROT EGIN ZUTEN.
2015eko Xakeko Taldekako Euskal Liga martxoaren 7an amaitu
zen. Sestao EDP A taldeak lortu zuen titulua. Laugarrena du. Azkeneko 6
urteetan lortu ditu titulu guztiak.
Azkeneko
txandan Grosekiko puntu eta erdiko abantaila mantendu behar zuen. Ez zion
ustekabeari lekurik eman nahi izan eta 2.714ko eloko Ruslan Ponomariov ukraniarra
eta 2.659ko eloko Romain Edouard frantziarra erabili zituen. Donibane Kirol
Elkarteko Roi Reinaldo Castiñeirak eta Luis David Jimenez Almeidak galdu zuten
haien aurka. Mario Gomezek irabazi zion Adrian Aldaveri, 546ko eloko desoreka
zuen partida batean. Gabriel Del Riok berdinketa besterik ez zuen egin Ignacio
Martinez Fernandez de Arcayarekin, baina emaitza hori eraginik gabekoa izan zen
azkeneko sailkapenari begira.
Gros,
hala ere, saiatu zen eta 4-0 irabazi zion Abadiñori. Titulua ez zion horrek
eman, baina Abadiño Lehenengo Mailara bidali zuen. Azkeneko tokian bukatu zen
talde abadiñoarra, Ligaren indarraren erakusgarri.
Conteneok
eta Urnietak lehia erabakigarria zuten. Bilbotarrek 2 puntuko abantaila
mantentzea erdietsi zuten. Berdinketak mailan jarraitzea eman zion eta Urnieta
Lehenengo Mailara igorri zuen.
Arrasate-Arlutz
arriskuan zegoen, baina Batallarekin 2-2 eginda, puntu erdiarengatik saihestu
zuen jaitsiera. Batalla bosgarren geratu zen, Donibane laugarrenarekin puntuz
berdinduta.
San
Viatorrek ezin zuen Orvina A-ren aurka hutsik egin. 2-2ko emaitzak hurrengo
urterako txartela ziurtatu zion. Orvina Ak denboraldi oso txukuna egin zuen,
modu erosoan hirugarren geratuta.
Sestao
eta Gros oso berdinduta ibili ziren txapelketan. Puntu bateko aldea besterik ez
zen izan bien artean. Momentu puntualetan eliteko maisuekin aritzeak eman zion
titulua Sestaori.
AZKENEAN EASOK
LAGUNDUKO DU ALTZAGA, OHOREZKO MAILAREN ITZULERAN.
Zuri Baltzak huts egin zuen azkeneko txandan. Ez zen gauza izan Calasanzi garaitzeko eta berdinketak utzi zuen igoeratik kanpo.
Beste
lehia garrantzitsuan Easok eta Zornotzak berdindu zuten. Beraz, biak geratu
ziren Zuri Baltzaren aurretik, puntu erdiarengatik. Easo izan zen Ohorezko
Mailara itzultzea lortu zuena.
Hori bai,
hirurak geratu ziren Orvina B-ren atzetik. Ustekabean 3-1 gainditu zuen Sestao
B eta hirugarren postuan geratu zen Iruñeko taldea.
Sestao
B-k bere laugarren titulua lortu zuen Lehenengo Mailan. Altzagak ia harrapatu
zuen azkeneko egunean, San Viator B-ri 0-4 irabazi ondoren, baina lehenago
eskuratutako errentak eman zion titulua Sestao B-ri.
Kultur
Sustapenak 2’5-1’5 garaitu zuen Anaitasuna Kakute, baina sailkapenari begira
garrantzirik gabeko lehia izan zen. Bi talde hauek, San Viator B eta Calasanz
izan ziren lurraldeetako txapelketetara jaitsitakoak.
2015-03-07.
Iturria:
Euskal Xake Federakuntza.